Korrieri Mikel Zeneli, kishte detyrë të shpërndante kutitë postare te klientët dhe tarifën monetare te këtij shërbimi, t’ia dorëzonte kompanisë.
Por 49-vjecari për shumë muaj, mbajti vlerat monetare për vete dhe deklaroi te punëdhënësi se klientët nuk i kishin tërhequr porositë.
Për ta bërë më të besueshme, i pandehuri kthente kutitë duke i mbushur me sende të tjera. Sipas dosjes hetimore, Mikel Zeneli kishte vendosur në kutitë që kthente, gurë dhe në një rast tjetër bluzën e tij.
Historia e vjedhjes është zbuluar nga punonjësit e postës private gjatë një komunikimi me klientët dhe më pas, vendosën të hapnin kutitë e kthyera, duke konstatuar në dy kuti që kishte sende të tjera.
Ekonomisti i kompanisë ka kallëzuar se punonjësi Mikel Zeneli, në pozicionin e korierit për shpërndarjen e postës në kohë të ndryshme i ka shkaktuar dëm këtij subjekti në shumën rreth 3000 (tre mijë) Euro.
Mikel Zeneli është duke dhënë llogari para drejtësisë për akuzën e “Vjedhjes duke shpërdoruar detyrën”, ndërsa po gjykohet në gjendje të lirë nga Gjykata. Për një muaj, Zeneli qëndroi në burg, derisa pagoi borxhin prej 3 mijë euro kompanisë dhe rregulloi marrëdhëniet me ta.
Mikel Zeneli ka pranuar para hetuesve ngjarjen dhe ka bashkëpunuar me hetuesit deri në shlyerjen e borxhit. Ndërkohë, rezulton të jetë babai i dy fëmijëve dhe jetonte më qira.
